Aurkezpena

Ingurugiroaren arazoak

Naturan egiten diren kirolek kontzientzia ekologiko garrantzitsua piztu ohi dute jarduera hauek egiten dituztenengan, eta surfa ez da salbuespena. Surflariak beti izan dira lehenetarikoak ingurumenari egiten zaizkion gehiegikeriak salatzeko orduan. Horrela, urteetan zehar hainbat erakunde sortu dituzte espazio naturalen kontserbazioaren inguruan, kutsadura edota bizileku naturalen suntsipena bezalako arazoen aurrean jendearen kontzientzia orokorra esanguratsuki areagotuz.

Hala ere, existitzen da gaur egun kontraesan franko surflarien ingurumen kontzientzia eta kirol eta industri jarduerak naturan sortzen dituzten eraginen artean. Surf industriak 750.000 surf taula ekoizten ditu urtero. Material sostengarriz edo biodegradagarriz eginiko taulen kopurua irrigarria da, eta material ez toxikoen erabilera tasa ere arrunt apala da.

Foam tradizionalarentzat alternatiba sostengarrien plazaratzeak aurrerapauso handia suposa dezake industriaren ingurune-inpaktua murrizterako orduan, industriaren jarduteak surflarien balio eta itxaropenekin bateratuz.

Surf industriak duen buruhauste ekologiko larriena foam-aren (poliuretano bitsa) fabrikazio eta erabileran aurkitzen da. Foam-a surf taularen barnean dioan materiala da eta bi ingurumen arazo nagusi suposatzen ditu; toxizitatea eta birziklatzeko edo biodegradatzeko ezintasuna. Arazo honen inguruan kezka nabarmena ari dira adierazten surflariak eta industria berau ere, batez ere Isozianatoetan oinarritutako foam-aren harira, osasunerako eta ingurumenerako kaltegarri diren heinean. Foam hau ohikoa izan da surfaren mundu merkatuan azken hamarkadetan, eta beronen erabilerak konflikto larria sortzen du surflarien balioen eta industriaren jardueraren eraginen artean.

TXFOAM foam ekologiko berri baten ikerketa eta garapenera bideraturiko proiektua da, surf taulen ekoizpenean erabiltzeko.

GAIA (Euskal Herriko Elektronika eta Telekomunikazio Cluster Erakundea) eta ESTIA-ak ((Ecole Supérieure des Technologies Industrielles Avancées) bultzaturik, proiektuaren helburu nagusia foam material alternatiboa lortzea da, zeinak foam tradizionalaren (poliuretanozkoa) ezaugarri bertsuak izan behar dituen, bai kostu eta bai ezaugarri mekaniko aldetik.

Azken finean, proiektu honen xedea surf industriari ingurumen ikuspegitik sostengarria den foam alternatibo bat eskaintzea da, praktika industrialak eta surflarien balioak adiskidetuz, zeinak kontzientzia ekologiko garrantzitsua duten.